Wednesday, June 22, 2022

សារព័ត៌មាន ស្ពានដែក (www.speandak.com) យើងខ្ញុំ សូមស្វាគមន៍ បងប្អូនប្រិយមិត្ត ទាំងអស់ដែលបានចូលរួមអានព័ត៌មានផ្សេងៗ នៅក្នុងគេហទំព័រយើងខ្ញុំ សូមគោរពជូនពរដល់បងប្អូន អោយជួបប្រទះតែសេចក្តីសុខសេចក្តីចំរើនគ្រប់ៗគ្នា នឹងពុទ្ធពរទាំងឡាយ ៤ ប្រការគឺ៖ អាយុ វណ្ណៈ សុខៈ ពលៈ កំុបីឃ្លាងឃ្លៀតឡើយ ។ "សូមអរគុណ"

សូមស្វាគមន៍ ចំពោះលោកអ្នកដែលបានចូលមកកាន់គេហទំព័រ ព័ត៌មានយើងខ្ញុំ


អភិបាលស្រុកបន្ទាយស្រី៖ «អ្នកភូមិពើងឆ័ត្រប្រែហើយ»! ប្រែពីទម្លាប់រស់នៅដាច់ដោយឡែកៗពីគ្នា មកជារបៀបរស់នៅបែបជាសហគមន៍ «អ្នកភូមិពើងឆ័ត្រប្រែហើយ»! ប្រែពីទម្លាប់រស់នៅដាច់ដោយឡែកៗពីគ្នា មកជារបៀបរស់នៅបែបជាសហគមន៍ ពីការរស់នៅបណ្តែតបណ្តោយតាមយថាកម្ម មកធ្វើជាម្ចាស់នៅលើបញ្ហាប្រឈមនៅក្នុងសហគមន៍របស់ខ្លួន ពីធ្លាប់តែរុកចូលព្រៃធ្វើចំណាកស្រុកដើម្បីរករបរចិញ្ចឹមក្រពះ មកជាអ្នកដាំបន្លែ ចិញ្ចឹមមាន់ ចិញ្ចឹមឃ្មុំដើម្បីផ្គត់ផ្គង់ជីវភាពវិញម្តង។ 

 

ហើយពីផ្ទះសម្បែងមិនសូវមានរបៀបរៀបរយនិងជួនកាលគ្មានសូម្បីតែបង្គន់អនាម័យប្រើប្រាស់ មកជាមានលំនៅឋានសមរម្យថ្លៃថ្នូរអាចរស់នៅបានសឹងតែគ្រប់ៗគ្នា ពីគ្មានទឹកបរិភោគប្រើប្រាស់នៅរៀងរាល់រដូវប្រាំង មកជាមានបណ្តាញទឹកស្អាតរបស់សហគមន៍បំបែករត់មកដល់ផ្ទះរៀងៗខ្លួន ពីសម្លេងគាំទ្រការដឹកនាំរបស់អាជ្ញាធរមូលដ្ឋានត្រឹមតែជាង៣០% កាលពី៥ឆ្នាំមុន មកជាតំបន់ដែលផ្តល់ការគាំទ្រដល់មេភូមិរបស់ខ្លួនរហូតដល់ទៅ៩០% តែការផ្លាស់ប្តូរទាំងអស់នេះមិនមែនកើតឡើងដោយចៃដន្យនោះទេ។ 

 

 កាលពី២០២០ រដ្ឋបាលស្រុកបន្ទាយស្រីបានសហការជាមួយអង្គការលំនៅឋានមនុស្សជាតិកម្ពុជា ជ្រើសរើសយកភូមិពើងឆ័ត្រដើម្បីសាកល្បងអនុវត្តគម្រោង”លើកកម្ពស់សហគមន៍ដើម្បីភាពរឹងមាំ” ក្នុងគោលបំណងកែប្រែស្ថានភាពនៅក្នុងសហគមន៍ទាំងមូល ផ្តល់ភាពរឹងម៊ាំនិងលំនឹងជីវិត ព្រមទាំងអាចមានលទ្ធភាពគ្រប់គ្រង ម្ចាស់ការ និងអភិវឌ្ឍបន្តដោយខ្លួនឯងបាន ក្រោយពេលគម្រោងដែលមានរយៈពេល៣ឆ្នាំនេះត្រូវបានបញ្ចប់។ 

 

 “ពើងឆ័ត្រ”គឺជាភូមិដ៏តូចមួយនៅក្នុងឃុំឃុនរាម ដែលមានប្រជាពលរដ្ឋរស់នៅត្រឹមតែ១៣៩គ្រួសារប៉ុណ្ណោះ ប៉ុន្តែមានអត្រានៃភាពក្រីក្ររហូតដល់ទៅជាង៤០% ដែលជាអត្រាខ្ពស់ជាងគេបំផុតនៅក្នុងស្រុកបន្ទាយស្រី។

 

 ២ឆ្នាំបានកន្លងផុតទៅ ថវិកាជាងពាក់កណ្តាលនៃថវិកាសរុបជិត ២០មុឺនដុល្លារ ក៏ត្រូវបានប្រើប្រាស់រួចមកហើយ ក្រុមការងារពិតជាបានធ្វើឱ្យមានការផ្លាស់ប្តូរជាវិជ្ជមានសម្រាប់ភូមិមួយនេះត្រឹមតែក្នុងរយៈពេលខ្លី និងមានភាពខុសប្លែកពីមុនស្ទើរតែរកកន្លែងចំណាំមិនបាន។

 

 ទឹកមុខ និងស្នាមញញឹមរបស់ពុកម៉ែបងប្អូននៅក្នុងសហគមន៍ ដែលខ្ញុំបានឃើញនៅក្នុងប្រជុំរួមដើម្បីត្រួតពិនិត្យវឌ្ឍភាពរបស់គម្រោង ពិតជាបានផ្តល់ក្តីសង្ឃឹមយ៉ាងខ្លាំងទៅដល់ការផ្លាស់ប្តូរជោគវាសនា និងការកាត់បន្ថយភាពក្រីក្រនាពេលអនាគតរបស់ភូមិដែលធ្លាប់តែក្រខ្សត់មួយនេះ។ 

 

បន្ថែមពីលើវិសាលភាពនៃគម្រោង រដ្ឋបាលស្រុកបន្ទាយស្រីក៏បានជំរុញឲ្យមានការជួយជ្រោមជ្រែងក្រោមរូបភាពផ្សេងៗទៀត ដូចជា តាមរយៈការវិនិយោគទៅលើហេដ្ឋារចនាសម្ព័ន្ធសាធារណៈ ការបំពាក់អំពូលសូឡានៅតាមផ្ទះ ការតភ្ជាប់បណ្តាញអគ្គីសនី និងការជួយដោះស្រាយបញ្ហាកង្វះខាតទឹកប្រើប្រាស់ សំដៅធ្វើយ៉ាងណាឲ្យអ្នកភូមិពើងឆ័ត្រ អាចមានឱកាសងើបផុតពីភាពក្រីក្រ និងធ្វើការតភ្ជាប់ភូមិពើងឆ័ត្រចូលទៅក្នុងចរន្តសេដ្ឋកិច្ចរបស់ស្រុក ដើម្បីទទួលបានឱកាសការងារ មុខរបរ និងលើកស្ទួយជីវភាពប្រជាជននៅក្នុងភូមិ ឱ្យបានប្រសើរឡើងដូចភូមិដទៃទៀតនៅក្នុងស្រុកបន្ទាយស្រីផងដែរ៕

 









 

សូមជូនពរបងប្អូនគិចផុតពីជម្ងឺកូវីដ ១៩ (កុំភ្លេច ៣ការពារ នឹង ៣កុំ)


ការិយាល័យព័ត៌មាន Tel: 070 968 168 - 097 4444 136