ត្បូងឃ្មុំៈ ពិធីសូត្រមន្តកាន់បិណ្ឌវេនទី៣ ស្រាប់តែអគ្គិភ័យមួយបានឆាបឆេះចេញពីក្នុងព្រះវិហារ វត្តសុវណ្ណបទុមវតី ហៅវត្តរកាឃ្នួច បង្កការភ្ញាក់ផ្អើលដល់ព្រះសង្ឃ និងពុទ្ធបរិស័ទចំណុះជើងវត្ត មកជួយដងទឹកពន្លត់ និងរាយការណ៍ប្រាប់សមត្ថកិច្ច ទាក់ទងរថយន្តពន្លត់អគ្គិភ័យចេញអន្តរាគមន៍ភ្លាមៗផងដែរ។
អគ្គិភ័យឆេះបល្ល័ង្កព្រះ ក្នុងវត្តសុវណ្ណបទុមវតី ហៅវត្តរកាឃ្នួចនេះ បានកើតឡើងនៅវេលាម៉ោង៣៖៣០នាទីរសៀលថ្ងៃទី២៦ ខែកញ្ញា ឆ្នាំ២០១៨ ស្ថិតនៅភូមិរកាឃ្នួចជើង ឃុំជីគរ ស្រុកត្បូងឃ្មុំ ខេត្តត្បូងឃ្មុំ។ អគ្គិភ័យនេះ បានរលត់ទាំងស្រុង បន្ទាប់ពីរថយន្តពន្លត់អគ្គិភ័យរបស់អធិការដ្ឋាននគរបាលស្រុកត្បូងឃ្មុំ សហការរថយន្តពន្លត់អគ្គិភ័យក្រសួងមហាផ្ទៃអន្តរាគមន៍ពន្លត់ ដោយប្រើប្រាស់ទឹកអស់៣រថយន្ត ដែលបណ្ដាលឲ្យខូចខាត ព្រះពុទ្ធបដិមាករ(ថ្ម) ៤អង្គ(ធំ៣អង្គ តូច១អង្គ) ឆេះរោលសសរព្រះវិហារ ១ដើម ឆេះកង្ហា Hatari ភ្ជួរជញ្ជាំង ៦គ្រឿង ឆេះរោលផ្ទាំងគំនូរ ដំបូលព្រះវិហារ ខូចខាត២០%។ មូលហេតុ បណ្ដាលមកទៀនវស្សា ដែលដាក់នៅមុខបល្ល័ង្កព្រះ សម្រាប់ពុទ្ធបរិស័ទអុចអូប។
Tags:
ពិធីបុណ្យផ្សេងៗ