ក្រចេះ៖ កាលពីល្ងាចថ្ងៃទី២៨ ខែសីហា ឆ្នាំ២០១៨ កម្លាំងអាវុធហត្ថស្រុកស្នួលសហការជាមួយជំនាញរដ្ឋបាលព្រៃឈើឃ្សឹមបានចាប់រថយន្តសេរីទំនើបមួយគ្រឿងដឹកឈើប្រណីតល្មើសច្បាប់នៅចំណុចទួលថ្មពុកស្ថិតក្នុង ភូមិឃ្សឹម ឃុំឃ្សឹម ស្រុកស្នូល ខេត្តក្រចេះ។
មន្ត្រីអាវុធហត្ថស្រុកស្នួលបានឲ្យដឹងថាកម្លាំងចូលរួមសហការមានអាវុធហត្ថស្រុកស្នួលជាមួយជំនាញរដ្ឋបាលព្រៃឈើឃ្សឹមបានឃាត់រថយន្ត១គ្រឿងម៉ាកកាមរីហាយព្រីតពណ៌ស ពាក់ស្លាកលេខភ្នំពេញ2AJ-1624 ។ ផ្ទុកឈើប្រណីត ប្រភេទធ្នង់ចំនួន ៦៧ដុំ ចំណែកអ្នកបើកបរដឹកឈើប្រណីតល្មើសច្បាប់នេះបានគេចខ្លួនបាត់។
មន្ត្រីអាវុធហត្ថរូបនោះបានបញ្ជាក់ថារថយន្តសេរីទំនើបមួយគ្រឿងនេះបានដឹកឈើប្រណីតល្មើសច្បាប់ដឹកចេញពីស្ទឹងត្រែងឆ្លងកាត់ខេត្តក្រចេះបម្រុងយកទៅលក់នៅព្រំដែនប្រទេសវៀតណាម។ តែអកុសលមកដល់ស្រុកស្នួលត្រូវកម្លាំងអាវុធហត្ថស្រុកស្នួលសហការជាមួយជំនាញរដ្ឋបាលព្រៃឈើឃ្សឹមស្ទាក់ចាប់បានតែម្តង។
មន្ត្រីជំនាញរដ្ឋបាលព្រៃឈើឃ្សឹមបានប្រាប់ឲ្យដឹងថាបច្ចូប្បន្ន វត្តុតាងខាងលើរក្សាទុកនៅសង្កាត់រដ្ថបាលព្រែឈើឃ្សឹមរង់ចាំការវាស់វែងនឹងចាត់ការតាមនីតិវិធីច្បាប់រដ្ឋបាលព្រៃឈើ៕
Tags:
ព័ត៌មានជាតិ