ស្វាយរៀងៈ ស្លាប់ ចោលប្រពន្ធកូនខ្ចី ទើបតែសម្រាលបានជិត១០ថ្ងៃ បុរសម្នាក់ បានស្លាប់ក្នុងស្រះទឹកនៅផ្ទះឪពុកម្តាយក្មេក
ដោយសារតែបូមទឹកស្រះរីង ហើយក៏យកខ្សែភ្លើងមករាយ ដើម្បីឆក់ត្រី
ប៉ុន្តែអកុសលឆក់ខ្លួនឯង។
ហេតុការណ៍នេះ បានកើតឡើងកាលពីវេលាម៉ោង៩៖២០នាទីព្រឹកថ្ងៃទី១៧ ខែមករា ឆ្នាំ២០១៩ នេះ នៅផ្ទះម្តាយក្មេក ស្ថិតក្នុងភូមិត្រពាំងឈូក ឃុំខ្សែត្រ ស្រុកកំពង់រោទិ៍ ខេត្តស្វាយរៀង។
បើតាមក្រុមគ្រួសារសពបានឲ្យដឹងថា មុនពេលកើតហេតុនោះ គឺជនរងគ្រោះជាបងប្អូនសាច់ញាតិបាននាំគ្នាបូមទឹកស្រះ ដើម្បីយកត្រីមកធ្វើម្ហូប ដែលជាថ្ងៃចូលរោងការបងថ្លៃស្រី។
ប្រភព បានបន្តទៀតថា ក្រោយពីបូមទឹកចេញពីស្រះរីងអស់ហើយនោះ ក៏នាំចាប់ត្រីអស់ហើយ គេនាំគ្នាឡើងលើគោកអស់នៅសល់តែជនរងគ្រោះ បានរាយខ្សែភ្លើង ដើម្បីឆក់ត្រីបន្តដោយមានអ្នកឈរមើល និងឈរចាំទទួលត្រី ដោយមិនដឹងថា ជនរងគ្រោះឆក់នោះទេ។
ប្រភពបានបន្ថែមទៀតថា លុះជនរងគ្រោះឆក់ដួលក្នុងភក់ល្បាប់ ទើបដឹងថា ត្រូវខ្សែភ្លើងឆក់ប៉ុន្តែហួសពេលទៅហើយ ព្រោះជនរងគ្រោះស្លាប់ភ្លាមៗនៅកន្លែងកើតហេតុ។
ជនរងគ្រោះដោយខ្សែភ្លើងឆក់ស្លាប់នោះឈ្មោះ អ៊ុក ភិរម្យ អាយុ២៨ឆ្នាំ មានទីលំនៅភូមិបុស ឃុំស្វាយតាយាន ស្រុកកំពង់រោទិ៍ ខេត្តស្វាយរៀង មានប្រពន្ធទើបសម្រាលកូនរួចបានជិត១០ថ្ងៃប៉ុណ្ណោះ។
