ក្រចេះ៖ កាលពីល្ងាចថ្ងៃទី ០២ ខែតុលា ឆ្នាំ ២០១៧ ហេតុកាណ៍ដ៏រន្ធត់មួយបានកើតឡើងដោយរថយន្ត ០១ គ្រឿង និងម៉ូតូចំនួន ០២ គ្រឿង ត្រូវបានទឹកហូរវាយប៉ើងធ្លាក់តាមទឹកទៅផ្នែកខាងក្រោមទំនប់ព្រែកថ្ពង់ ស្ថិតក្នុងឃុំស្នួល ស្រុកស្នួល ខេត្តក្រចេះ ខណៈធ្វើដំណើរឆ្លងកាត់សំណង់បង្ហៀរដែលទឹកកំពុងហូរបុកខ្លាំង ។ ហេតុការណ៍ដ៏រន្ធត់ខាងលើនេះ មិនបានបង្កឱ្យគ្រោះថ្នាក់ដល់ជីវិតមនុស្សនោះទេ ប៉ុន្តែរថយន្តចំនួន ០១ គ្រឿង និងម៉ូតូ ចំនួន ០២ គ្រឿង ត្រូវបានរងការខូចខាតយ៉ាងដំណំ ។
សេចក្តីរាយការណបន្តថា រថយន្តនិងម៉ូតូដែលខាងលើ ជារបស់ភ្ញៀវដែលជិះចូលទៅទទួលទានអារហារនៅក្នុងរមនីយដ្ឋានថ្ពង តែម្តង ។ ទោះជាបែបណា ក្នុងហេតុការណ៍ដ៏រន្ធត់នេះ មិនត្រូវបានបង្កឱ្យមានគ្រោះថ្នាក់ដល់អាយុជីវិតអ្នកជិះក្នុងរថយន្ត និងម៉ូតូនោះទេ ក៏ព្រោះតែជនរងគ្រោះបានលោតចុះពីលើរថយន្តទាន់ នៅពេលដែលឃើញសភាពការទឹកជំនន់បានជន់ហូរកួចខ្លាំង។ប្រភពបន្តថា ស្ថានភាពភ្លៀងបានបង្អុលធ្លាក់យ៉ាងខ្លាំង ស្ទើរគ្រប់ដណ្តប់នៅទូទាំងខេត្តមានរយៈពេលជាច្រើនម៉ោង ។ ក្នុងនោះបណ្តាលឱ្យតំបន់មួយចំនួននៅតាមបណ្តាស្រុក មិនថាតែតំបន់ខ្ពង់រាប ឬទំនាប ត្រូវជន់លិចដោយជំនន់ទឹកភ្លៀង។
Tags:
អត្ថបទក្នុងប្រទេស