បាត់ដំបង៖ អុចធូបទុកចោល ហើយទៅលេងផ្ទះអ្នកក្បែរខាង ក្រោយបន្តិចត្រូវអគ្គីភ័យឆាបឆេះផ្ទះអស់គ្មានសល់។ ប្រភពពីសមត្ថកិច្ចជំនាញ បានឱ្យដឹងថា ឧបទ្ទវហេតុអគ្គីភ័យបង្កការរាលដាល ឆាបឆេះយ៉ាងសន្ធោសន្ធៅរយៈពេលខ្លីនេះ បានកើតឡើងនៅវេលាម៉ោង១០ៈ០០នាទីយប់ ថ្ងៃទី២៧ ខែកញ្ញា ឆ្នាំ២០១៨ នៅត្រង់ចំណុចក្រុមទី១ ភូមិបឹងស្នួល ឃុំអំពិលប្រាំដើម ស្រុកបវេល ខេត្តបាត់ដំបង។
លំនៅដ្ឋាន១ខ្នងដែលរងការឆេះខ្ទេចខ្ទីអស់នេះមាន ទំហំ៧ គុណ ៥ម៉ែត្រ ជញ្ជាំងធ្វើអំពីស័ង្កសី និងដំបូលប្រក់ស័ង្កសីខូចខាតអស់ទាំងស្រុង។ ជនរងគ្រោះដែលជាម្ចាស់មានឈ្មោះ ទុយ ភី ភេទប្រុស អាយុ៦៥ឆ្នាំ និងប្រពន្ធឈ្មោះ សុខ ធី អាយុ៤១ឆ្នាំ មានទីលំនៅក្នុងភូមិ ឃុំ កន្លែងកើតហេតុខាងលើ។ ជនរងគ្រោះប្រាប់ឱ្យដឹងថា មុនពេលកើតហេតុខ្លួន២នាក់ប្តីប្រពន្ធ បានអុចធូបដូចទម្លាប់ធម្មតា ហើយក៏បានដើរលេង និងមើលទូរទស្សន៍នៅផ្ទះអ្នកជិតខាងគ្នា មួយសន្ទុះក្រោយមកក៏កើតការភ្ញាក់ផ្អើលភ្លើងបានឆាបឆេះផ្ទះរបស់ខ្លួនតែម្តង។ ទ្រព្យសម្បត្តិដែលបាត់បង់រួមមានៈ ប្រាក់ចំនួន ២០០០ដុល្លារ (ពីរពាន់ដុល្លារអាមេរិក) ប្រាក់ថៃចំនួន ២០០០បាត(ពីរពាន់បាត) ប្រាក់រៀលចំនួន ៣០ ០០០រៀល (បីមុឺនរៀល) អង្ករ ៣ការ៉ុង និងសម្ភារៈប្រើប្រាស់មួយចំនួនទៀតធំទៀត។
Tags:
ព័ត៌មានជាតិ